ఘనత!

కన్నీటి చారల్లో
ఘనీభవించిన మమత!
ఆకలి కోరల్లో
మూర్తీభవించిన భవిత!!

ఈ జన్మకిది చాలు

నన్ను ప్రేమించావనుకున్నా..
కానీ ఇంతలా అనుకోలేదు
ఏంటసలిది...?
ప్రేమ కోసం ఏమైనా చేస్తానంటే
ఏదో అంటున్నావనుకున్నా
ప్రేమకు హద్దులనేవే లేవనీ
ఇలా నిరూపిస్తావనుకోలేదు
నన్నింతలా ప్రేమించేవాళ్లున్నారని
తెలిసింతరువాత
ఇక నాకేమీ అక్కరలేదు
నేను ఉన్న పళంగా
చచ్చిపోయినా పరవాలేదు
ఈ జన్మకిది చాలు..
ఈ జన్మకిది చాలు...!

గెలుపు

పొటీలో ఒకరిని ఓడిస్తేనే
కాదు గెలుపు -
ఓటమిని సహృదయంతో
స్వీకరించినవాడిది కూడా గెలుపే!

ప్రేమ

ఒకరిని కలిసినప్పుడు
సంతోషంగా ఉంటే
అది ఇష్టం -
ఒకరు లేనప్పుడు
చచ్చిపోవాలనిపిస్తే
అది ప్రేమ!

ఓటమి

గెలుపును
తలకెక్కించుకోవడమే
అసలైన ఓటమి!

త్యాగం

నీ బాగు నువ్వు చూసుకుంటే
అది స్వార్థం ..
నీ కుటుంబాన్ని బాగుచేసుకుంటే
అది ధర్మం..
ఆ రెంటితోపాటు దేశంకోసం
కృషి చేస్తే అది దేశభక్తి..
అవి రెండూ కాదని దేశానికే
అంకితమైతే అది త్యాగం!

అమ్మ

నువ్వు ప్రయోజకుడివయ్యావా లేదా
అని చూస్తాడు నాన్న..
తనపరువు తియ్యకుండా ఉంటే చాలు
అనుకుంటాడు అన్న..
పెళ్లైన తరువాత కూడా
తనమీద ప్రేమ అలాగే ఉండాలని
కోరుకుంటుంది చెల్లి..
రోజూ కడుపునిండా తింటున్నాడా లేదా
అని కలవరపడేది అమ్మ ఒక్కతే!