స్పందన

బండబారిన గుండెలు మనకొద్దు
స్పందించే హృదయాలు కావాలి -
ప్రియురాలి స్పర్శకు
అణగారిన ఆశలు రేగాలి,
సఖి చూసిన క్రీగంటి చూపుకు
నరనరాల్లో నక్షత్రాలు వెలగాలి -
అంతే వేగంతో.......
అభాగ్యులు చేసే ఆర్తనాదాలకు
పాషాణమైన గుండె సైతం కరగాలి
కళ్లెదుట జరుగుతున్న అకృత్యాలను చూసి
ఆవేశం కట్టలు తెంచుకోవాలి

ఆపదలో ఉన్నవాళ్లను ఆదుకునేందుకు
చేతులు ముందుకు రావాలి
అన్యాయాన్ని ఎదిరించేందుకు
అడుగులు వడిగా కదలాలి...
ప్రేమైనా..పోరాటమైనా,
కరుణైనా..కదనరంగమైనా,
సరసమైనా.. సమరమైనా...
బండరాళ్ళు కాదు -
కరిగే గుండెలు కావాలి..
కదిలే హృదయాలు కావాలి!