కళ్లలోనుండి ప్రవహిస్తుంది
కారు చీకటి -
మస్తిష్కంలో నిస్తేజమై నిలబడింది విశ్వం -
చిట్టచివరి ఆలోచన ఎప్పుడో పిట్టలా ఎగిరిపోయింది -
అగాథానికి చేరిన కన్నీటి పొర
అడుగంటి ఇంకిపోయింది -
దారి చూపుతున్న త్రోవ హఠాత్తుగా అదృశ్యమైంది -
చుట్టూ ఉన్న గాలి స్థంభించిపోయింది -
ఇక మిగిలిందేముంది?
దేనికోసం పోరాడాలి?
ఎవరికోసం బ్రతుకునీడ్చాలి?
చచ్చిపోతే పోలా?
ఏం ఎందుకు చావాలి?
ఏమీ లేదనుకున్నప్పుడు
ఎదురుతిరిగి పోరాడితే పోయేదేముంది?
విధి రాసిన రాతను
చెరిపేయడానికి ప్రయత్నిస్తే తప్పేముంది?
నీ తలరాతను నువ్వే రాసుకో..
నీ బాటను నువ్వే పరచుకో..
నీ భుజం నువ్వే తట్టుకొని
నీ జీవితాన్ని నువ్వే మలచుకో..
నీ గమనాన్ని మార్చుకో..
నీ గమ్యాన్ని చేరుకో!
