ఇది ప్రక్షాళణ సమయం

ఆలోచనలకు చెదలు పట్టి
మెదడు డొల్లబారింది
శ్వాస కల్మషమై
ఊపిరితిత్తులు కుళ్లిపోయాయి
నెత్తురు గడ్డకట్టి
ప్రవాహం ఆగిపోయింది
నడవడిక కుంటిదై
చతికిల పడింది
తనువంతా నీరసించి..
నరాలన్ని కృశించి..
కదిలే ఓపికలేక..
బ్రతికే దారేతెలియక..
ఉన్నచోటే కాళ్లు దిగేసుకొని
ఊబిలో కూరుకుపోతున్నాం -
కాలం కళ్లలోనే బందీ అయింది
తీరం సముద్రంలో కరిగిపోయింది
ఇక ముందుకు సాగలేం..
ఉన్నచోటే ఉండలేం..
ఇది మార్పుకు అదును -
ఇది ప్రక్షాళన సమయం -
ఇదే ఆఖరిపోరాటం కావాలి...
ఇదే గెలుపుకు సోపానంగా మారాలి!