అంతరం

మనిషినుండి మనిషిని దూరంచేసేదేమిటి?
కులం? మతం? ప్రాంతం? 
లేక..భాష? వేషం? అహం? అభిప్రాయ భేదం?

నాకైతే ఎప్పుడూ కనిపించేది ఒక్కటే -  

మంచికీ చెడుకూ మధ్య
నలుగుతున్న ఒక సన్నటి పొర.. 
చీకటికీ వెలుతురుకూ నడుమ 
తారాడుతున్న ఒక పలుచని తెర..
మానవత్వాన్నీ అమానుషత్వాన్నీ  
వేరుచేస్తున్న ఒక పెళుసైన చాఱ..   
మిత్రత్వాన్నీ శతృత్వాన్నీ 
విడదీస్తున్న ఒక అస్పష్ట ధార - 

కావాలనుకుంటే ఆంతా మనదే..
కాదనుకుంటే అందరూ పరాయివాళ్లే..  

అంతరం - 

ఒక చిన్న ఆలోచన..
ఒక చిన్న అవగాహన..

ఇంకా..
కొద్దిగా స్నేహం..
కొద్దిగా త్యాగం -
కొంచెం ఇష్టత.. 
మరికొంచెం స్పష్టత!