స్వేచ్ఛా గీతం

పురి విప్పిన నెమలినై 
శివమెత్తిన కడలినై   
గగనాన్ని తాకాలనుకునే నన్ను   
ఆంక్షల వలయంలో బంధిస్తానంటే ఎలా?

ఈ అడవిలో....
స్వేచ్చగా విహరించాలనుకోవడం తప్పా?
ఈ నేల నాది,
ఈ గాలి నాది... 
ఈ చెట్లు, ఈ పక్షులు-
నా నేస్తాలు.. 
ఇక్కడ తిరుగాడే వన్యమృగాలు-
నా చెలికాళ్ళు..

నేను పుట్టగానే నన్ను లాలించిన పరిసరాలు...
నా ప్రతి శ్వాసలో, ప్రతి ఆశలో 
నా ప్రతి అడుగులో నా వెంటే ఉంటూ
నన్ను నడిపించిన పంచభూతాలు...
వాటినుండి ఈరోజు నన్ను వేరుచేస్తానంటే
నేను ఆక్షేపించడం నేరమా?

చావైనా బ్రతుకైనా ఈ అడవిలోనే-  
ఎప్పటికైనా నా అంతిమ శ్వాస..
నా అడవి సాక్షిగా,  
ఈ పంచభూతాల్లో కలసిపోవాల్సిందే..

నా మాటకు తిరుగులేదు!
నా బాటకు అడ్డులేదు!!
నా పాటకు చావులేదు !!!