ప్రేమంటే....

    ప్రేమకు
    కొత్త నిర్వచనాలు -
    ప్రేమిస్తే ప్రాణమిస్తా
    ప్రేమించకుంటే
    ప్రాణం తీస్తా!
    అవునంటే గుండెలో చోటిస్తా
    కాదంటే గొంతు కోస్తా!
    అవసరమైతే
    ప్రేమికురాల్ని చంపైనా
    ప్రేమను బ్రతికించుకుంటా!
    ప్రేమ త్యాగం చేస్తుంది
    అది నిన్నటి మాట
    ప్రేమ పగను పెంచుతుంది
    ఇది నేటి బాట!
    ప్రేమంటే ఆనందించాలో...
    భయపడి చావాలో...
    అర్థం కాని రోజులొచ్చాయ్‌!!

కసాయి ప్రేమ

కత్తులతో
కుత్తికలు
కోసేవాడు
కసాయి వాడౌతాడు గానీ..
ప్రేమికుడు
ఎన్నటికీ కాలేడు!

చీకటి అరుణిస్తే..

దుఃఖం నవ్వితే
చూడాలనుంది,
కన్నీరు విప్లవిస్తే
జైకొట్టాలనుంది,
భయం అభయమిస్తే
స్వీకరించాలనుంది,
మూగతనం పల్లవిస్తే
వినాలనుంది,
నిస్సహాయత నిప్పులు కక్కితే
చిందులేయాలనుంది!

వైపరీత్యం

మండు వేసవిలో
పండు వెన్నెలలు,
చలికాలంలో
వేడి గాల్పులు,
వర్షాకాలంలో
ఎండిన చెరువులు,
వసంత కాలంలో
రాలే ఆకులు,
శిశిరంలో
కోయిల గానాలు -
ఏమిటీ పైత్యం
అనుకుంటున్నారా..
ఇది పైత్యం కాదు
విధి వైపరీత్యం -
మానవ తప్పిదాలకు
ప్రకృతి దారితప్పితే
జరగబోయే పరిణామం!

దారుణం

ప్రకృతి రవంత
కన్నెర్ర జేస్తే
విలవిలలాడే మానవుడు...
దాన్ని కుళ్లబొడవడానికి మాత్రం
ఇసుమంత వెనుకాడడు!

మొండి మనసు

మనసు మూగదైనా
ఎన్నెన్ని మాటలు
చెబుతుంది నాకు..!
అన్నీ వింటాన్నేను -
నేనెంత చెప్పినా..
అది మాత్రం
కొంచెం కూడా
వినిపించుకోదు!!

అసందర్భం

 

 

 

 

అవసరమైనప్పుడు
అర్థం చేసుకోదీ మనసు!
అర్థమయ్యేటప్పుడు
అవసరంలేదంటుందీ వయసు!!