నేను

నా ఊహొక ఉప్పెన
నా చూపొక చిత్రం
నా హృదయమొక కవనం
నా గమనమొక భూభ్రమణం
నా చలనమొక చైతన్య గీతం
నా ఆకలి ఒక పొలికేక
నా మనసొక అగ్ని సరోవరం
నా మాటొక తుపాకీ తూటా
నా అక్షరమొక సంధించిన బాణం
నా జీవితమొక తెరచిన పుస్తకం!

రెక్కల్లేని పక్షులు

గూడులేని బడులు
జాడలేని నిధులు..
అమలుకాని చట్టాలు
అక్కరకు రాని చుట్టాలు..
పుస్తకాల్లేని చదువులు
చెట్లకింద పాఠాలు..
ఇది...
మన పిల్లలకు మనం
వేస్తున్న పునాది!

చరిత్ర లేని సామాన్యుడు

గతాన్ని తవ్వుకుంటూ పోతే
జ్ఞాపకాల శిథిలాలు
బయటపడుతూ పోతాయ్‌
ఆశిథిలాలకింద నలిగి
నుజ్జు నుజ్జైన చరిత్ర పుటలు
తిరిగి రాయబడతాయ్‌
ఏ సింహాసనం ఎంత గొప్పదో
ఏ రాజ్యం ఎంత పెద్దదో
ఎవరి ప్రేమ వ్యవహారం
ఎన్ని మలుపులు తిరిగిందో
ఏ గోపురం ఎవరు కట్టించారో
ఏ కోటను ఎవరు కూల్చారో
ఒకదాని వెంట ఒకటి
గిర్రున తిరుగుతాయ్‌ -

ఏ యుద్ధంలో ఎంతమంది మరణించారో
ఏ రాజు ఎవరిని ఓడించాడో
అన్నీ కళ్లముందు కనబడతాయ్‌ -
కానీ బయటపడంది ఒక్కటే...
తరతరాల రాజ్య కాంక్షలో
నరనరాల  మృగతృష్ణలో
నేలకొరిగిన సైనికుల స్వగతం..
సమిధలైన సామాన్యుల జీవితం!

అదృశ్య ప్రేయసి

నాకెప్పటికీ
అర్థం కాని విషయం...
ఒక రహస్య సంబంధంలా
అనిపిస్తుంది
ఏదో ఇంద్రజాలంలా..
భావగర్భితంగా..
శ్రావ్యమైన సంగీతంలా..
నను వెంటాడుతూ
వేటాడుతూ
కనిపించకుండా నా చుట్టే తిరుగుతూ
గాల్లో పరిమళాలు వెదజల్లుతూ...
ఏంటోమరి ఈ అనుబంధం
ఏనాటిదో ఈ బంధం
తను నా దరిదాపులోకి వస్తే
నాకిట్టే తెలిసిపోతుంది
ఆ అడుగుల సవ్వడి నాకు గురుతే
ఆ మల్లెల సౌరభం నాకు ఎరుకే
తనిక్కడే ఎక్కడో వుంది
నన్నే చూస్తుంది
నా అంతరంగ తరంగాలను
తప్పించుకొని ఎక్కడికీ పోలేదు!

మల్లె తీగలు

 

 

 

 

మల్లెతీగల్లా
అల్లుకునే వాళ్లను
ముళ్ళ కంచెలు
ఏం చెయ్యగలవ్‌??
కళ్లముందే అల్లుకొని..
కంచెనంతా కమ్ముకొని..
మల్లెపూల సుగంధాలను
ఎల్లవేళలా వెదజల్లుతుంటే!

నవ్వుతూ బ్రతకాలిరా..

భయం భయం
అంతా భయం మయం
బ్రతకాలంటే భయం
చావాలన్నా భయం
తప్పును తప్పు అనాలన్నా భయం
గొంతు విప్పి మాట్లాడాలన్నా భయం
ఎదురుగా కనిపించేది
చూడాలంటే భయం
చూసింది చెప్పాలంటే భయం
కళ్లు తెరిస్తే భయం
కళ్లు మూస్తే భయం
అడుగడుగునా భయం
శ్వాస శ్వాసకూ భయం
ఇలా భయపడుతూ ఎంతకాలం?
భయాన్ని జయించు
భయాన్ని భయపెట్టు
భయపెట్టేవాణ్ణి భయపెట్టు
భయాన్ని చంపు
నువ్వు బ్రతుకు!
నవ్వుతూ బ్రతుకు!!

అక్షరం

అక్షరం నా ప్రాణం
అక్షరం నా ఆహారం
అక్షరం నా ఆహార్యం
అక్షరం నా అణువణువున నిండిన
తీయని మకరందం
అక్షరం నా చక్షువులకు
ఆనందం కలిగించే సుందర స్వప్నం
అక్షరం నా మస్తిష్కాన్ని
మథించే ఆలోచనా పథం
అక్షరం నన్ను ఆదుకునే
జగన్నాథ రథం
అక్షరం నాకు శక్తినిచ్చే
వజ్రాయుధం!