సైనికుడా సాగిపో..

ఎందుకు దుఃఖిస్తున్నావ్‌?
ఏమయిందని?
ఏం పోయిందని?
నీ అస్థిత్వం గాయపడలేదే..
నీ ఆత్మకు అంటు తగల్లేదే..
నావాళ్లంటూ
ఎవరూ మిగల్లేదని విషాదమా..
ఎవరు నీవారు?
ఎవరు పైవారు?
ఎవరు నీతో ఉండాలని కోరుకున్నావ్‌?
ఎవరు లేరని బాధపడుతున్నావ్‌?
నీలో నీవు లేవా?
నీకు తోడు నీవు కాదా?
నీ నీడతోనైనా నీకేంపని?
నీదారి నీకు స్పష్టంగా ఉన్నప్పుడు -
నీ దారిలో నువు పోతున్నప్పుడు..
నీవెనుక ఎవరైనా
ఉంటే ఏం?
లేకపోతే ఏం?
గగనసీమల్లో సంచరించే వాళ్లకు
గతి తప్పుతామేమోనన్న భయమెందుకు?
అఖండజ్యోతి సుదూరంగా
కనిపిస్తున్నంత కాలం
చిరు చీకట్లకు అదరాల్సిన పనిలేదు!
బెదరాల్సిన ఆగత్యం అంతకన్నాలేదు!!