అప్పుడప్పుడు...
గతంలో నేనొదిలేసిన
నా పాదముద్రలు
నన్ను పలకరిస్తుంటాయి...
గాఢనిద్రలో ఉన్న నా తలపులను
తట్టి లేపుతుంటాయి...
నాతో వాగ్వివాదానికి దిగుతుంటాయి --
మేము అప్పుడే చెప్పాం,
నువ్వు వినలేదంటూ
నన్ను నిలదీస్తుంటాయి...
అప్పుడు పరికించి చూస్తాను
అవును.. నిజమే...
కొన్ని పాదముద్రలు సవ్యంగా, కొన్ని అపసవ్యంగా...
కొన్ని స్పష్టంగా, కొన్ని అస్పష్టంగా....
కొన్ని తడబడి నట్టుగా...
కొన్ని అడుగులయితే వడివడిగా వేసినట్టుగా....
కొన్ని అయిష్టంగా, కొన్ని భయంగా....
కొన్ని కోపంగా, కొన్ని అనాలోచితంగా.....
ఒక్కో అడుగూ...ఒక్కో తీరుగా --
అయితే ఇప్పుడేం చేయాలి?
మీరంతా నా గతం,
మిమ్మల్ని ఎప్పుడో మర్చిపోయాను...
మళ్లీ నన్ను కలవద్దని కోపంగా చెప్తాను --
కానీ అవి వింటేగా??
నా ప్రమేయం లేకుండా
నన్ను వెంటాడుతూనే ఉంటాయి!
ఏదో సమయంలో ప్రత్యక్షమై
నన్ను నిలదీస్తూనే ఉంటాయి!!
No comments:
Post a Comment