విముక్తి

బొడ్డు తాడు కోసి
తల్లి నుండి బిడ్డను
విడదీసినంత సులువు కాదు,
మాతృభూమితో మమేకమైన 
మమతల్ని  వేరు చేయడం --

రాజ్యకాంక్ష,
మత వివక్ష,
వర్గ విభేదం,
సరిహద్దు వివాదం --
కారణం ఏదైతేనేం?
ఒక చిరు హృదయం
ఛిద్రం  కావడానికి...
ఒక ఆశల పల్లకీ 
తల్లకిందులవడానికి...
ఒక అందమైన బంధం
అంతమై పోవడానికి...
ఒక నందనవనం
వేర్లతో సహా ఒరిగిపోవడానికి...
ఒక ఊహల సౌధం
అగ్నిలో ఆహుతవ్వడానికి --

స్పర్శించే గాలీ,
స్పృశించే నేలా, 
పలకరించే పైరూ,
పరవశించే ఏరూ --
అన్నీ దూరమై,
శ్వాసే భారమై,
చెల్లా చెదురై...
శరణార్థులై...
పరాయి నేలపై
విషాద జీవితం వెళ్లదీస్తున్న
శాపగ్రస్థులకు
విముక్తి ఎపుడో? 
విడుదల ఎన్నడో??