జీవన రాగం

ఇప్పుడెందుకంత ఉదాసీనత?
ఏదో పోగొట్టుకున్నట్టు -
ప్రపంచంలో ఉన్న బాధంతా
నీలో గూడుకట్టుకున్నట్టు..
చిన్నప్పుడు ఎంత హాయిగా
ఉండే వాడివి -
ఎప్పుడూ నవ్వుతూ,
అందర్నీ నవ్విస్తూ,
ఆడుతూ పాడుతూ -
ఏం? అప్పట్లో నీకేమీ బాధల్లేవా..?
ఎందుకు లేవు..!
అయినా పట్టించుకొనేవాడివి కాదు
మరిప్పుడేమైంది?
చాలా పెద్దవాడివాయ్యావని,
వయసు మీద పడిందని,
బరువు బాధ్యతలు పెరిగాయని..
అసలు నవ్వడమే మర్చిపోయావా?
ఏం? నువ్వలా దిగాలుగా కూర్చుంటే
సమస్యలు సమసి పోతాయా?
వ్యథలు కరిగి పోతాయా?
చుట్టపు చూపుగా వచ్చే సమస్యలతో
సతమతమవడం ఎందుకు?
సంతోషాన్ని నీ బలం చేసుకో
ఉత్సాహాన్ని నీ ఆయుధంగా మలచుకో
వెతల వలయాన్ని ఛేదించు
జీవన రాగాన్ని ఆలపించు!