నీ కన్నిటికన్నా ఇష్టమైనదేదీ అని
ఎవరైనా అడిగితే
'చెట్టు' అని టక్కున చెప్పేస్తా -
చెట్టుకున్న మంచితనం,
చెట్టుకున్న దయాగుణం,
చెట్టుకున్న ఆదర్శ భావం..
మరి దేనికీ ఉండదేమో..!
చెట్టు ఎంత ఎత్తు ఎదిగినా
చూపులన్నీ జన్మనిచ్చిన నేలమీదే నిలుపుతుంది
దాని కొమ్మలన్నీ విరిచినా
నీ ఇల్లై తలదాచుకొమ్మంటుంది
దానికి నీరు పోయకున్నా
నీ దాహం తీర్చడానికి
మేఘాలను కురిపిస్తుంది
ఆ వర్షంలో తడిచి నువ్వెక్కడ ముద్దవుతావోనని
మళ్లీ నీ గొడుగవుతుంది
అది పండించుకున్న పళ్ళన్నీ కోసుకుతిన్నా
పల్లెత్తుమాటనుకుండా మళ్ళీ మళ్ళీ కాస్తుంది
తను ఎండకు రగులుతున్నా
నీకు నీడనివ్వడానికి తహతహలాడుతుంది
నువ్వు వండుకు తినడానికి నిప్పవుతుంది
నీ ఆరోగ్యం చెడిపోతే
నీకు మందవుతుంది
చివరకు నువు పోయినప్పుడు
నిను కాల్చడానికి కట్టెవుతుంది
దాన్ని మొదలంటా నరికినా
నిన్ను పలకరించడానికి మళ్లీ చిగురిస్తుంది
అందుకే....
నన్ను చెట్టంత మనిషిని చెయ్యకపోయినా ఫరవాలేదు..
చెట్టులాంటి మనసు మాత్రం తప్పక ఇవ్వమని
ఆ దేవుణ్ణెప్పుడూ ప్రార్థిస్తూ ఉంటాను!
No comments:
Post a Comment