ఓ అణువు హెచ్చరిక!

నేను నిలుచున్న భూమి -

నాపైనున్న ఆకాశం -

మధ్యలొ ఉన్న నేను...

నాపరిమాణమెంత..?

నాకంటూ ఒక ఉనికి

ఈ బ్రహ్మాండంలో ఉందా?

నేనెందుకు ఇక్కడ ఉన్నాను?

నేనేం చెయ్యగలను..?

ఈ కొటానుకోట్ల

సూర్యమండలాలు

నిరంతరం ప్రజ్వలిస్తున్న

విశ్వాంతరాళంలో

కంటికి కనిపించనంతటి

ఒక చిన్న రేణువును...!

నాకున్న శక్తి ఎంత?

ఏమో...?

నాకనిపిస్తుందీ...

ఈ విశాల విశ్వాన్ని

ఒక్క గుటకలో మింగేయ గలనని..

ఈ నక్షత్ర మండలాలన్నింటినీ

ఒక్క చిటికెలో సమాయత్తం

చేయగలనని..

ఏమో..ఈవిశ్వాన్నంతా

కబళించగల శక్తి

నాలో ఉన్నదేమో అనిపిస్తుంది

నిద్రాణమైఉన్న నాశక్తిని

ఉసిగొలిపితే ఈ విశ్వాన్నే

హరించివేయ గలనేమో..?

అందుకే ఓ మానవుడా..!

నన్ను దీర్ఘనిద్రలో ఉండిపోనీ..

నా శక్తిని నాలోనే

నిక్షిప్తమైపోనీ..

ఈ మానవాళి మనుగడకు

ముప్పు వాటిల్లనీయకు!